FESTIVALI NDËRKOMBËTAR I FILMIT NË CANNES

nga **Sunset girl** prej Fri Jun 20, 2008 11:15 pm

FESTIVALI NDËRKOMBËTAR I FILMIT NË CANNES
“Festivali është një tokë apolitike që s’i përket askujt;
një mikrokozmos që na tregon se si do të dukej bota
sikur njerëzit të mund të flisnin me njëri-tjetrin
në mënyrë të drejtpërdrejt dhe sikur të mund të flisnin gjuhën e njëjtë.”
Jean Cocteau

Në vitin 1939, Ministri i atëhershëm francez për Arsim Publik dhe Art, Jean Zay propozoi që të organizohej një ngjarje ndërkombëtare filmike në Francë dhe me këtë rast, qyteti i Cannes-ës u përzgjodh për shkak të “klimës së ngrohtë dhe ambientit mahnitës”. Megjithatë, Festivali i parë ndërkombëtar i filmit u shty për shkak të luftës. Në vitin 1945, Asociacioni Francez për Angazhime Artistike u angazhua edhe një herë për të organizuar një festival nën patronazhin e Ministrisë së Punëve të Jashtme, Ministrisë për Arsim Kombëtar dhe që nga viti 1946 e tutje, edhe nën patronazhin e Qendrës së porsaformuar Kombëtare për Kinematografi (CNC).

Më 20 shtator 1946, Festivali Ndërkombëtar i Filmit në Cannes – si ngjarje e parë e rëndësishme kulturore në nivel ndërkombëtar pas përfundimit të luftës – i hapi dyert e tij në ndërtesën e dikurshme të Casino de Cannes. Ky Festival funksiononte si një organizatë jo-fitimprurëse dhe udhëhiqej nga një Bord i drejtorëve, kurse në vitin 1972, ky Festival arrin të fitojë një status bamirës. Festivali është mbajtur çdo vit me përjashtim të viteve 1948 dhe 1950, kur ky Festival u anulua për shkak të mungesës së fondeve. Në fillim, Festivali i Filmit në Cannes mbahej në muajin shtator dhe më pas, që nga viti 1951, ka filluar të mbahet në muajin maj, kurse i tërë Festivali zgjat përafërsisht dy javë. Në vitin 1968, ky Festival u ndërpre për shkak të trazirave politike.

Në fillim, Festivali ishte pikë së pari një ngjarje turistike dhe shoqërore; ishte më shumë një forum për film sesa një garë, meqë pothuajse çdo film i shfaqur shpërblehej me ndonjë çmim. Me kalimin e kohës, me rritjen e numrit të pjesëmarrësve dhe me zhvillime të reja ekonomike, erdhi gjer te ndryshimi i konceptit të këtij Festivali. Ky Festival u bë ngjarje vjetore e industrisë së filmit, të cilën e përcjellin një numër jashtëzakonisht i madh i mjeteve të komunikimit masiv nga mbarë bota dhe sot në këtë Festival vijnë zakonisht mbi 4000 gazetarë, të cilët përfaqësojnë 1600 kompani të mjeteve të komunikimit masiv.

Që nga viti 1959, krijimi zyrtar i Tregut të Filmit (Marche du Film) e shtoi edhe më shumë rëndësinë e festivalit, duke i dhënë kështu edhe një platformë komerciale dhe duke i hapur rrugë takimeve dhe diskutimeve në mes të blerësve dhe shitësve në industrinë e filmit. Gjatë këtyre 45 viteve të ekzistimit të këtij Tregu të Filmit, i cili rritet dhe zhvillohet vazhdimisht, Marche du Film ka arritur të bëhet një treg kryesor në biznesin e filmit në nivel ndërkombëtar.

Paralelisht me Përzgjedhjen Zyrtare, në vitin 1962, filloi të organizohej Java Ndërkombëtare e Kritikëve (International Critics’ Week), kurse në vitin 1969 filloi të mbahej edhe Dyjavëshi i Regjisorëve (Directors’ Fortnight) dhe në këto dy ngjarje, garat organizohen me rregulla të posaçme. Në vitin 1978, me iniciativën e Koordinatorit të Përgjithshëm të Festivalit në atë kohë, Gilles Jacob, filloi të ndahej edhe çmimi “Camera d’Or” (“Kamera e Artë”) me të cilën do të shpërblehej filmi i parë më i mirë, i cili është shfaqur në ndonjë nga tri përzgjedhjet.

Në fillim, në këtë Festival shfaqeshin filma të përzgjedhur nga vendi prej nga vinin. Në vitin 1972, me kërkesën e Koordinatorit të Përgjithshëm të Festivalit, Maurice Bessy, Kryetarit të atëhershëm të Festivalit, Favre le Bret si dhe Bordit të Drejtorëve – u vendos që vetë organizatorët e Festivalit të bëjnë përzgjedhjen e filmave nga mbarë bota dhe të vendosin se cilët filma do të shfaqen në këtë Festival. Ky vendim shënoi një kthesë të madhe dhe shumë shpejt, kjo rregull filloi të zbatohej edhe në festivalet tjera.